Copie

Par queii, nati nei ani 30,ghe gera un tirocinio, prima de deventar copie, qualche ano de fidanzamento, e no ghe gera verso de farsela dar prima de verghe messo l’anelo, e dopo se parlava de la crisi del setimo ano, vol dir che le copie, ben o mal, durava almanco sete ani, e intanto nasceva i fioi che rinsaldava i sentimenti sbiadii,e quela volta, quando che uno gera sposà, no ’l gaveva e mosche che ghe girava intorno cme se ‘l fuse miel, parchè ghe gera rispeto par i marii de le altre, quela che ‘ndava co un omo sposà vegniva tratada da putanon dal resto de la società.

No come adesso che a dodes’ani e va a conviver col moroso co i genitori consenzienti, parchè:”i tempi xe cambiai”. E po’ co i se sposa, se i se sposa, dopo do tre mesi i se inacorze

de no essar adatti l’uno par l’altra, e ‘l matrimonio se desfa. Che xe un pecà, se non altro par quela barca de schei che ga dovesto tirar fora e famegie par el pranzo, la cerimonia, el vestito,i mobili, e bomboniere e via col tran,dove che se vede che l’importante no xe la sostanza (costruir ‘na famegia) ma l’apparir.

eco la solita poesia:

Ecce homo

Nel milenoveçentotrentanove

Al vintidờ de agosto so ‘rivà

So nato; adesso nó ricordo dove

In casa, in ospeal ó a la pietà

E in fin ecome qua a far el nono

Par “colpa” de mia mama e mio papà

No so parchè ,Voria tornar embrion,

sperando de nó movarme de là

e sparagnar cussì le delusion

che,nel so corso, la vita me ga da

anca parchè co xe sucesso el fato

nissuni me ga proprio interpelà.

Francesco 26 mag. 05