cosiderassion de inissio ano

Semo qua tuti, come ogni capodano, a sperar che'l prossimo sia un ano meio de quelo appena passà, che no xe stà un granché, alluvion,tsunami, guere, terorismo e gente, tanta gente che pianxe parché i ga perso fioi, parenti, amissi, ormai semo bituai a magnar co i cadaveri, davanti i oci, in television e te vien da domandarte ma ti Signor dove ti geri?Dacordo che'l to disegno xe imperscrutabile,ma ocore sempre tuta sta soferensa?
ed ecove la solita poesia:

Mascare…


mascare de cartapesta

immagini antiche de furbi Arlechini ridenti

Rosaure ardenti d’amor par Lindoro
el puto de sesto

foresto e senza coragio ma …

d’alto lignagio

e co’l servo in livrea

Brighela fedel servitor ossequiente

Che, roba, impudente, dadrio le spale al paron.

Pantalon che conta i zechini in mezà

Che tira sui prezzi

E crede, coi bezzi,

poder acquistar dignità

Pulcinela

Eterno afamà

Arguto e rufian

Che incarna,

l’alegra tristessa del Napoletan…


mascare…

mascare de cartapesta

che torna ogni ano a far festa

co xe carneval

par darghe, al mortal l’illusion

de star su la scena de un mondo diverso,

più bon,

mimando la parte de quei personagi

che ne” la comedia de l’arte”

ridendo, te invita a desmentegarte

la vera comedia

…la vita

Francesco Cavasin 17.12. 1979

el ritorno del gransio

Ghe xe na roba che no capisso e cioè se el tg1 se ga inacorto che no ghe xe piu el governo Berlusconi!

Parché i continua a propinarne ogni giorno e stesse facce,Fini, La russa, Gasparri, Bondi, Cicchitto, Giovanardi, e i soliti vescovi,cardinali,monsignori e preti semplici, che, cossa tivol che i diga?

Se no tirar l'acqua al mulin de la cesa. E tuti vien a far el so comissieto, a spuar velen sul governo, e me domando?Quando xe che sta maragia finirà de romparne i cogioni e sentiremo parlar de politica seriamente che ghe xe bisogno de capir, ogni tanto!!

Co portavo la taia….(soneto)


Co portavo la taia çinquanta
Pesavo otanta chili, e no novanta
Statura poco più de un metro e otanta
Adesso che go ben passà i sessanta
E me ritrovo co ‘na pansa tanta
E come quei che magna, beve, e canta
Rimpianso un poco la mia taia çinquanta
Che ormai xe deventà taia sessanta

Francesco (21 dicembre 2006)

el ritorno del gransio

Xe morto el povero Giorgio Welby e 'l spetacolo de l'ipocrisia dei nostri politici, se ga rivela dal tutto nei vari dibattiti che go seguio in television, musi de circostansa e pronti a sbranarse pur de portar le proprie tesi politiche, rispettabilissime, ma,come sempre, de parte.
in un mio post precedente gavevo dichiarà el mio schifo e, sinceramente continuo a provarlo!!
No se pol viver in un mondo cussì falso sensa sentirse"a disagio" e no farse ciapar da la malinconia, me vien in mente 'na poesia che oltre a intonarse al prossimo NADAL xe abastansa malinconica:

Xe nato el Signor

Don

din,Don

din,dan

din,don,dan

che vien da lontan

un son de campane distante ne l’aria frizante

d’un Çielo

cosparso de stele comete

e parla de pase e parla de amor

parchè xe Nadal de nostro Signor

bom

bom,bom

bom,bom,bom

continua’lcanon

el canto stonà de la guera

che squassa la tera

la candida neve silente

vien zozo

e se macia de sangue innoçente

la furia de l’odio

ancor no .se quieta.

Xe nato el Signor….

Su n’altro pianeta?

Francesco 26/12/1994

che società vigliacca

Come non parlare dell'argomento del giorno cioè di quel Giorgio Welby
che è condannato, da questa società di merda, a vivere con la sofferenza di un tubo, piantato nell'esofago, e senza la possibilità di toglierselo, quel tubo che, garantendogli la possibilità di respirare, gli sta straziando le carni, provocandogli una sofferenza tale dal fargli agognare la morte.
e tutto ciò , per la vigliaccheria di una società in cui , neanche i giudici sono capaci di prendersi le loro responsabilità; che schifo!!
E mi fa tanto schifo, che non riesco a trovare altre parole, oltre a queste, per continuare a trattare l'argomento.(chiedo perdono ai miei lettori ma sta volta non mi sento di pubblicare alcuna poesia)!

mia Mare che gera'na popolana, sensa istrussion, me diseva, co gero toseto,ricordite, co le fie comportite onestamente e sopratuto no sta illuderle, co sto semplice conceto in mente, me go sempre comportà ben anca se gero come un can da tartufi, sempre in çerca de cucar, e, digo la verità adesso che so vecio, sti ricordi me scalda el cuor e, magari confondendo le date, me ne ricordo tante de quele putele che, forti de la belessa de l'asino, alora, me ga fato girar la testa me ricordo ,come se fusse desso quei viseti freschi che me vardava come se fusse el principe azzuro; e qua ghe vol 'na poesia:

“ me ricordo”

No go mai dito tanto “me ricordo”
Come adesso che passai i sesanta
E fate tante esperiense bele e brute

go acora el cuor che canta
co vedo un bel tramonto.
E saria ancora pronto a rifar
tuto quelo che go fato fin ‘desso

anca se no sò più lo stesso
de ‘na volta parché se cambia
anca dentro.

Me vien spesso in mente
E tosete de quando che gero fio
fresche e tenere co le basavo,
E le strucavo in qualche canton Scuro

e ghe disevo “amor”
credendome de essar
un gran conquistador
col timor de farme incastrar
e perdar la libertà de ‘ndar,
de far, quelo che volevo mi

amesso che lo savesse quelo che volevo
parché gero ancora tanto bauco e no savevo
che ne la vita tuto sucede quando che Dio vol
i monti el mar el çiel la luna e’l sol

xe tuto parte de quel gran disegno
de cui Signor mi çerco de essar degno

Francesco 23.10 2003